Trauerfeier Peter Kellerhals (1936 – 2022)
4. Februar 2022, Kirche Wohlen

Ueli Gruner
 

 
Liebi Rodi
Liebi Doris, liebi Heidi und Christoph, liebi Ruedi und Irene, liebi Verwandte, Fründe und Bekannti vom Peter Kellerhals.
 
Im Name vom Geologiebüro Kellerhals+ Haefeli AG wett i öich, liebi Familie Kellerhals, üsi härzlechi Ateilnahm überbringe.
 
D Familie Kellerhals het mi bätte, es paar Wort z säge zum Läbe vom Peter Kellerhals als Geolog, als Firmegründer, als Chef, als Lehrmeister, als Patron.
 
I wett mi Rückblick gärn i zwe Teile glidere: Als Erschts gib i ne churze Läbenslouf vom Peter Kellerhals als Geolog. Und als Zwöits wett i mi gärn mit chlyne Gschichte und Episode am Peter anächere. I dänke, ihr chönnet ihn däwäg als Mönsch vil besser erfasse als mit Näme oder Zahle.
 
Zum erschte Teil
Dr Peter Kellerhals het sis Geologie-Studium a dr Uni Bärn gmacht. I de Jahr 1959 bis 1963 isch är für Fäldarbeite im Unterengadin gsi, gnauer im abglägnige Gebiet vo S-charl. Scho im Jahr 1964, also it 28 Jahr, het är sini Studie mit em Doktorat abgschlosse.
 
Zwüsche 1965 und 1967 isch dr Peter dank emne Forschigstipändium in Kanada a dr Uni vo British Columbia in Vancouver gsi. Es paar Tag vor dr Rückreis us Kanada het me am Peter Kellerhals e Stelle als Professor für Geologie in Ottawa abotte. Zrügg ir Schwiz het är zäme mit em Rodi gwärweiset: Lehrtätigkeit – är isch nid grad wahnsinnig Fan drvo gsi, aber s wäre doch e sicheri Stell gsi - oder selbständige Geologe mit eigetem Büro in Bärn. Dr Füfliber, so het mir dr Peter einisch verzellt, heig gäge Kanada entschiede…
 
Im 1967 also het der Peter Kellerhals die erschte Tätigkeite als praktizierende Geolog i Agriff gno. Dr Bürostandort isch es Zimmer ir Wohnig vor Muetter ar Kapellestrass gsi. Für üs ischs 1967 drum ou s Gründigsjahr vom Büro Kellerhals + Haefeli. Scho bald het dr Peter Kellerhals Lüt agstellt, e Zeichnerin, anderi Geologe, e Sekretärin. Als Büroinhaber het är sini Stunde im SIA -Tarif A chönne und dörfe verrächne, also dr höchschtmöglich Stundeasatz. Doch dr Peter isch gschickt und mit Bureschläui vorgange: Är het sini Arbeit zwar im A-Tarif verrächnet. Will är aber no ne junge Geolog sigi gsi – so hets mr dr Peter verzellt –, heig är 50% Rabatt gä. Das isch natürlich guet acho…
 
Im Jahr 1970 isch de als Partner Benedikt Tröhler drzue gstosse. I dere Zyt het dr Peter Kellerhals ou geologischi Arbeite i vilne Länder im Usland gmacht, vor allem in Afrika und im Nache Oste. Nach em Tod vom Benedikt Tröhler im Jahr 1980 het dr Peter si Studiekamarad Charles Haefeli als nöie Partner chönne gwinne. Glydrufabe bin i de als junge, unerfahrene Geolog i das Büro iträte. Übrigens: Ou bi mir het dr Füfliber gäge Kanada im Erdöl und für Bärn im Büro Kellerhals und Haefeli entschide…
 
S Büro isch witer gwachse, het vili grossi Ufträg übercho. Es ghört hüt mit rund 35 Lüt zue de grössere Geologieunternähme ir Schwiz.
 
Im 1990 hets Büro Kellerhals + Haefeli dr Uftrag für e Lötschberg-Basistunnel übercho, mit einere Bedingig: S Büro müess en AG si – und so heisst die Firma sit 1991 Kellerhals + Haefeli AG.
 
Im Jahr 1996 hei dr Peter Kellerhals u dr Charles Haefeli beschlosse, us em Büro uszträte, all ihri Aktie z verchoufe und s Heft dr nächschte Generation z übergäbe. Dr Peter isch denn ja erscht 60 gsi, u d Gründ dadrfür het är mir de ersch später einisch verrate: Är heig z vil Sitzige u z wenig Fäldarbeite gha, är heig nid ständig welle aquiriere, offeriere u de d Arbeit glych nid sälber mache und schliesslich heig är nid welle, wie anderi Büroinhaber, bis ids höche Alter täglich ids Büro cho, d Poscht aluege und drufabe einzeln ga verteile…
 
Nach sim Rückzug het dr Peter de wider würklech chönne Geologie mache, so wie’s ihm passt und ou gfalle het. Mängisch isch är im Büro ufchrüzt, damit eini vo üsne Sekretärinne es Brichtli für ihn tippi – u jedesmal hets schuderhaft pressiert. Später denn het är nume no Brichte gmacht, wenn er se het dörfe handgschribe abgä.
 
Zum Schluss vo däm erschte Teil wett i doch es paar vo de wichtige geologische Projekt uffüehre, wo der Peter Kellerhals massgäbend mitgstaltet het und won är ou stolz druf isch gsi:
 
Im Nationalstrassebau isch är i mängem Abschnitt verantwortlich gsi für d Geologie: Z.B. scho ganz am Afang im Jahr 1967 bir Autobahn i Bärner Jura mit ihrne vilne Tunnle, oder de bir Autobahn N1 Richtig Gümmene, bir Umfahrig Biel oder bir Nationalstrass am Brünig.
 
Dr gröschti und für ihn wichtigscht Brocke isch aber sicher dr Lötschberg-Basistunnel gsi, won är vor Prognose bis zum Afang vom Bou isch fäderführend drbi gsi.
 
Drnäbe het är grossi Ufträg bi de Wasserkraftwärk gha, vor allem bir KWO und bir BKW. Är het Quelle neu gfasset oder gschützt, het Naturgfahre wie Felsstürz oder Rutschige beurteilt und i de meischte grosse Grundwassergebiet im Kanton Bern het är ufwändige hydrogeologische Untersuechige chönne mache und d Resultat i dicke Brichte zämegfasst.
 
Zum zwöite Teil
Im däm zwöite Teil wett i versueche, es paar Gedanke zum Peter Kellerhals als Mönsch z formuliere: Är isch mi Chef gsi während 16 Jahr, mi Lehrmeister, üse Patron und ou Patriarch.
 
Mir hei hie inne alli vom Peter Kellerhals eigeti Idrück, wo mir in üs und mit üs trage, Vorstellige, wo vo persönliche Begägnige chöme. Es si villicht nume Näbesächlichkeite, chlyni Gschichte, Episode vo oder mit ihm, wo mir üs möge bsinne. Doch jitz, won är nüme da isch, wärde sie villicht ou einisch zue Bilder, wo de vor em innere Oug verbizieh. Villicht grad hüt Namittag, villicht ir nächschte Nacht oder villicht ou erscht ganz vil später.
 
I würd gärn es paar vo dene Idrück us mine Erinnerige vüre hole und öich verzelle. Und klar: Viles isch gfärbt vor eigete Erläbniswält, prägt ou vo däm, was i vo Peter ha glehrt, ha mitgno – oder ou, was i nid ha welle witergä als spätere Gschäftsleiter vom Büro Kellerhals + Haefeli.
 
Dr Peter Kellerhals als Patron
Dr Begriff Patron het hüt fasch e chly ne mystischi Bedütig: Dr Patron luegt zu de Lüt, setzt sech mit Hut u Haar für di Firma i, het sogar e väterlechi Rolle.
 
Ja, dr Peter het öppis vom ne Patron gha:
Z.B. wenn är aube vor Wiehnachte s ganze Büro nach Frieswil gholt het, und alli, wo hei welle, hei chönne i sym Wald e Tannebaum ga uswähle. Und druf hets bi ihm dehei öppis Warms z ässe gä. Das het verbunde.
 
Oder z.B. die folgendi Gschicht: I bi scho nes paar Jahr i däm Büro gsi, da bi ni i Stadtrat vo Bärn cho und ou grad Mitglied vor Gschäftsprüefigskommission worde. I bi inere Partei gsi, wo nid grad, ums mal vorsichtig uszdrücke, siner gsellschaftliche Grundhaltig entsproche het: S Junge Bärn, hüt Grüeni Freie Liste, isch ja eher links orientiert gsi. I ha mis Pänsum wäg dr Politik chönne uf 80% reduziere. Eines Tages isch der Herr Kellerhals zue mir cho und het zue mim grosse Erstuune gseit: Herr Gruner, Dir erfüllet e Ufgab zum Wohl vor Oeffentlichkeit. I zahle öich e Lohn vo 87.5%. Hoppla.
 
Druf, eis zwöi Jahr später, het er irgend e Bricht gläse vo mir, wo offebar nid grad so guet isch usecho. Er chunnt i mis Büro - sägemer mau zimlich lut: Das giengi so nüm. Es gäb ab sofort für mi e nöie Arbeitsvertrag. Dr Lohn isch bi 87.5% blibe, aber dr letscht Absatz vom nöie Vertrag het glutet: Herr Gruner erledigt die politischen Telefonate während seiner Freizeit. Hoppla. Aber i gwüsst warum und has ou sofort akzeptiert.
 
Oder z.B. mis persönliche Highlight: Im Jahr 1986 bin i zum Herr Kellerhals mit folgendem Alige gange: I wärdi nächschtens Vater und wett zwe Tag ir Wuche zum Chind luege, öbs ächt villicht möglicherwis giengi, dass i chönni 60% schaffe. Är isch grad e chly erchlüpft und irritiert gsi. Nach es paar Tag isch är zue mir cho u gmeint: Ja, das giengi. Me muess sech das mal vorstelle: Herr Kellerhals, eher konservativ, mit traditionelle Rollebilder im Chopf. Und de das. Vor 35 Jahr! Da chame nume säge: Chapeau!
 
Oder z.B. vier Jahr später, wo ni scho wieder mit emne spezielle Alige zum Herr Kellerhals bi gange: I wett mit minere jetzt vierköpfige Familie es ganzes Jahr id Toskana, öpps ächt villicht möglicherwis giengi, dass i nach emne Jahr wider chönni im Büro witerschaffe. Är isch, scho wider, e chly erchlüpft und irritiert gsi. Nach es paar Tag isch är zue mir cho u gmeint: Ja, das giengi. Handschlag, fertig. Nüt Schriftlechs. I bi de mit der Familie uf Italie und nach emne Jahr wieder zrüggcho. Im Büro de Begrüessig, Handschlag, fertig. Und i ha witergschaffet wie vorhär. Das gägesitige Vertraue het sech uszahlt. I bi über 40 Jahr i däre Firma gsi…
 
D Luune vom Peter Kellerhals
Mir hei im Büro der Herr Kellerhals kennt und alli hei’s gwüsst: Är isch mängisch missluunisch, ufbruusend oder mürrisch gsi. Die Einte hei sech e chly gfürchtet drvor, anderi hei sech gseit: Das muesch ushalte, es geit verbi…
 
Wenn är aube am Morge am halbi Nüni isch d Stäge ufglöffe, hesch scho ghört und gahnet, wies um sini Luune steiht. Oder denn spätischtens a dr Art, d Türfalle z betätige…Und wenn de dr Luun würklech nid guet isch gsi und är e Bricht vo u mit dir het welle aluege…Item.
 
Apropos Brichte korrigiere: Im Nachhinein, also nid hüt, sondern scho vor 20-30 Jahr, hani dörfe und chönne mit ere gwüsse Bewunderig feststelle: D Kritike si – us miner Sicht – i de meischte Fäll berächtigt gsi. Ou wenn’s dennzumal eifach e chly agnähmer hätti chönne drhärcho. Dr Peter Kellerhals isch e Meischter vor Logik gsi, e Meischter ou, Widersprüch imne Bricht ufzdecke, e Meischter, wie me Brichte strukturiert und e Meischter ou vo klare Ussage, wo für e Uftraggäber hilfrich si. Är isch für mi persönlich – das darf i hie ohni Truurpathos säge - e ganz e guete Lehrmeister gsi.
 
U de isch es ou vorcho, dass dr Peter Kellerhals i nere Missluun inne plötzlich isch cho frage, wär es Kaffee ids Safari ume Egge chäm cho trinke. Är het üs de drzue iglade, inklusive Nussgipfel. Mir si erliechteret gsi, und alles isch scho fasch wider vergässe gsi.
 
Apropos Safari: Wenn i dennzumal ab und zue nach em Mittag ids Safari bi nes Kaffee ga trinke – mir hei ja no kei Maschine im Huus gha -, hesch dert chönne dr Peter Kellerhals am z Mittag aträffe: Also gnauer: Vor sech es Yscaffee oder zwöi, drnäbe e Nussgipfel und es Stückli oder zwöi. Fürs Mittagässe hett är grob gschätzt keni zwo Minute bruucht…
 
Und apropos Stückli: D Familie Kellerhals het mi bätte, öich druf ufmerksam z mache, dass si i dr hütige Situation uf e Grept verzichte wett. Aber als chlyni Erinnerig a Peter und sis Safari-Zmittag gits am Usgang vor Kirche es Stückli oder villicht ou zwöi – allerdings ohni Yscaffee, das wär doch grad e chly kompliziert worde.
 
Dr Peter Kellerhals u die technische Hilfsmittel
Mit modärne, technische Hilfsmittel isch dr Peter Kellerhals nie z Schlag cho: Das het scho früeh vor miner Zyt agfange: Wo är mau em Tiefbauamt vom Kanton Bern insgesamt 7 Teilrächnige het abgäh, si si alli zrüggcho, es heig e Fähler drin, me chöni das nid akzeptiere. Dr Fählbetrag uf em Total vo mehrere 10‘000 Franke isch 15 Rappe gsi. Dr Grund isch ganz simpel gsi: Dr Peter het alles mit em Rächeschieber grächnet, der Kanton aber mit ere Rächnigsmaschine. Immerhin: No ir glyche Wuche, so der Peter Kellerhals, heig är e Rächnigsmaschine gchouft.
 
Sini Handchrift isch ja ou nid grad e Offebarig gsi. Aber dr Peter Kellerhals uf ere Schribmaschine umhacke – das het sech niemerts ernschthaft chönne vorstelle! Är het am liebschte – in alter Manier – diktiert. Das het gheisse, dass d Sekretärinne hei müesse chönne stenografiere. Und so isch das öppedie vor sech gange: Dr Peter Kellerhals isch nach emne länge Fäldtag am Abe mit em Auto ids Büro gfahre, het underwägs im Chopf si Bricht zämebüschelet u quasi fertig dänkt (und dadrbi vermuetlich mänge andere Autofahrer zuer Verzwiflig bracht). D Frau Küffer, wo nume am Abe und ir Nacht gschaffet het, het uf ihn gwartet. Im Büro het är de si dä Bricht innert Kürze pfannefertig diktiert. Am nächschte Morge isch alles tippet gsi und druf, vom Peter Kellerhals unterschribe, uf d Poscht gange.
 
Zum Abschied vom Büro hei mir em Peter i nere stille Hoffnig e Computer gschänkt. He ja: Mir hei dänkt, das chönnt nid nume für ihn, sondern – bi siner Handschrift – doch ou für sini spätere Uftraggäber e Offebarig gsi. Me het üs gseit, är heig dä Compi nid e mal uspackt…
 
Dr Patriarch
I has scho erwähnt: Dr Peter Kellerhals het patriarchalischi Züg gha: Är het dr Ton agä, und es het so müess si, wien är s het welle. Unbedingt. Und so hets de ou sälte längi Diskussione gä. Sini konserativi Site isch hie, trotz ou andere Erläbnis, immer wider zum Vorschiin cho.
 
So isch es z.B. zu siner Zyt nid i Frag cho, dass är e Geologin astellt. Oder ou e Ma mit emne Stecker im Ohr oder mit em ne Ohrringli het er nid welle ha im Büro. Ke Diskussion. Bis de irgendeinisch dr Peter Kellerhals doch öpper agstellt het mit länge, länge Haar und mit emne Stecker im Ohr. Nei, es es isch ke Frou gsi, es isch dr Dieter Böhi gsi. Me het mir gseit, dass ou em Peter siner Chind nadisnah a Ifluss gwunne heige. Übrigens: Dr Dieter isch hüt VR-Präsident vo dr Firma…
 
Liebe Zuehörerinne und Zuehörer da inne, liebe Peter
Dir gseht und du gsesch: Viles über di, Peter, isch ibrönnt i mine, i üsne Erinnerige. Di Muet, es Büro z gründe nach däm Füfliberentscheid, dies Wüsse, dini Kompetänz, dini Grosszügigkeit, dini Bureschläui und ou – das ghört halt ou zue dir – dini Site, wo mir hei müesse lehre, drmit z Schlag z cho. Dass mir das hei, zeigt, dass das Büro ou 25 Jahr nach dim Rückzug di Name treit.
 
I sälber luege i mine Erinnerige dankbar zrügg uf e langi Zyt mit dir, Peter. Meh als d Hälfti vo mim Läbe isch mit em Name Kellerhals verbunde. S Fundamänt, wo du vor 55 Jahr als Firmegründer gsetzt hesch, isch, wie sechs für e guete Geolog ghört, tragfähig und durhaft.
 
Liebi Zuehörerinne und Zuehörer: I danke für öiri Ufmerksamkeit. Und dänket dra, we dr usegöht us dere Kirche, näht es Stückli oder zwöi. Villicht chunnt nech bim Ässe im Innere di eint oder anderi Erinnerig uf a Peter. U de löht das Bild ganz langsam und liecht a öirem innere Oug la verbizieh.